تاند (یکشنبه، د زمري/ اسد ۲۵ مه) د افغانستان لپاره د امریکا پخواني ځانګړي استازي او د دوحې تړون مهم لوبغاړي، زلمی خلیلزاد، د متحده عربي اماراتو له مشهورې «نشنل» خپرونې سره په خبرو کې ویلي چې واشنګټن باید د خپلو جیوپولیټیکو ګټو لپاره له افغانستان سره خپل تعامل پراخ کړي.
خلیلزاد ویلي، له افغانستان څخه مخ اړول او له دغه هېواد سره د اړیکو محدودول به یوه ستره تېروتنه وي، ځکه په یوه مهم ستراتیژیک موقعیت کې تشه رامنځته کوي او د امریکا سیال هېوادونه به خوشحاله شي چې دا تشه ډکه کړي.
هغه د طالبانو د پنځه کلنې واکمنۍ د ارزونې په ترڅ کې ویلي چې په ځینو برخو کې د افغانستان وضعیت د ډېرو اټکلونو خلاف ښه پاتې شوی دی.
خلیلزاد زیاته کړې، مخکې داسې اندېښنې موجودې وې چې له افغانستان څخه به د ترهګرۍ ګواښ زیات شي، امنیتي وضعیت به خراب شي او د نړیوالې مرستې له کمېدو وروسته به اقتصاد او مالي وضعیت له سقوط سره مخ شي؛ خو د ده په وینا، دا ډول حالت تر ډېره رامنځته نه شو.
د امریکا پخواني ځانګړي استازي ویلي، طالبانو په ځینو برخو، په ځانګړي ډول د زیربناوو په پراختیا، د کرنې په ملاتړ او له سیمهییزو هېوادونو، په ځانګړي ډول له منځنۍ اسیا او ازبکستان سره په دیپلوماتیکو اړیکو کې، تر تمې ښه وړتیا ښودلې ده.
خلیلزاد د کابل او اسلاماباد د اړیکو د خرابېدو په اړه ویلي چې پاکستان د افغانستان د اوسني حکومت د مخالفانو ملاتړ کوي.
هغه ویلي، امریکا د پاکستان او افغانستان ترمنځ د اړیکو د دومره خرابېدو او د اسلاماباد د پخوانیو سیاستونو د بیا راګرځېدو اټکل نه و کړی، چې په وینا یې، پاکستان د افغانستان د اوسني حکومت د مخالفانو کوربهتوب کوي او د بېثباتۍ هڅه کوي.
په وروستیو کې داسي راپورونه ورکړل شوي چې پاکستان د افغانستان د طالبانو د حکومت وسله والو مخالفانو مشرانو ته په خپله خاوره کې دفترونه او وسله والو کسانو ته یې د روزنې کمپونه مهیا کړي دي.