تاند ( پنجشنبه د اسد/زمري ۲۲مه) افغانستان کې د طالبانو د حکومت د کډوالو او راستنېدونکو چارو وزارت وایي، چې ۸۷۵ تنه افغان کډوال له پاکستاني زندانونو څخه آزاد شوي دي.
دغه وزارت نن (پنجشنبه، د اسد ۲۲مه) پر اېکس پاڼه په یوه خبرپاڼه کې دا خبر خپور کړی دی.
په خبرپاڼه کې ویلي، چې یاد کسان د روانې اوونۍ په ترڅ کې د کندهار ،سینبولدک او د ننګرهار د تورخم له دروازو څخه افغانستان ته راستانه شوي دي.
د یاد وزارت په وینا، خوشې شوي کسان په پاکستان کې د بېلابېلو دلیلونو له امله بندیان شوي وو.
تر دې وړاندې هم یو شمېر افغان کډوال له پاکستاني زندانونو څخه تر خوشې کېدو وروسته افغانستان ته راستانه کړای شوي دي.
کارپوهان وایي، د افغان اتباعو خوشې کېدل او د دواړو هېوادونو ترمنځ د ستونزو حل د افغانستان او پاکستان د اړیکو د ښه والي لپاره مهم ګام دی.
دوی زیاتوي چې، د متقابل احترام، خبرو اترو او همکارۍ دوام کولی شي د دواړو هېوادونو ترمنځ باور لا پیاوړی کړي.
خو اندېښنه یې دا ده چې پاکستان لا هم هلته له افغان کډوالو سره د بشري حقونو خلاف چلند کوي او د لسو د خوشې کولو پر ځای شل نور زنداني کوي چې، د دوی په باور دا د دواړو هېوادونو ترمنځ اړیکې لا ترینګلې کولی شي.