تاند ( چهارشنبه د اسد/زمري ۲۱مه) په کابل کې د ایران سفارت ویلي چې د دغه هېواد د کرنې وزیر غلامرضا نوري قزلجه د یوه پلاوي په مشرۍ کابل ته راغلی دی.
د ایران سفارت نن چهارشنبه، د زمري ۲۱مه، په اېکس کې لیکلي چې د ایران پلاوی د طالبانو د حکومت له چارواکو سره د لیدنې او د کرنې او مالدارۍ د لومړني نړیوال نندارتون د لیدنې په موخه کابل ته راغلی دی.
د کرنې او مالدارۍ پنځهورځنی نړیوال نندارتون تېره ورځ په کابل کې پرانیستل شو.
د دې نندارتون په ترڅ کې د ایران محصولات په څه باندې ۳۰ غرفو کې نندارې ته وړاندې شوي دي.
اقتصاد پوهان د ایران د کرنې وزیر سفر افغانستان ته د دواړو هېوادونو ترمنځ د کرنې، مالدارۍ، سوداګرۍ او اقتصادي همکاریو د پراختیا لپاره مهم بللی دی.
دوی وایي، افغانستان د کرنې او مالدارۍ په برخه کې پراخ ظرفیتونه لري او له ګاونډیو هېوادونو سره د تجربو او ټکنالوژۍ شریکول کولی شي د دې سکټور په پیاوړتیا کې مرسته وکړي.
له بلې خوا، د نړیوال کرنیز نندارتون جوړېدل کولی شي افغان او بهرني سوداګر، تولیدوونکي او پانګهوال سره نږدې کړي.
د کارپوهانو په باورکه دا ډول نندارتونونه په دوامداره توګه تنظیم او عملي همکاریو ته زمینه برابره شي، د کورنیو تولیداتو د بازار موندنې، صادراتو او د هېواد د اقتصادي ودې لپاره به مثبتې پایلې ولري.