تاند (چهارشنبه د اسد/زمري ۷مه) افغانستان کې د طالبانو د حکومت د ټولګټو وزارت وایي چې په غزني کې د «خون کوتل» سړک د جوړولو چارې د ۶۳۲ میلیون افغانیو په لګښت ۴۷ سلنه بشپړې شوې دي.
د دغه وزارت ویاند، محمد اشرف حقشناس په اېکسپاڼه لیکلي چې دا سړک د ټولګټو وزارت له لوري له خصوصي سکټور سره قرارداد شوی او دا مهال یې چارې په چټکۍ سره جریان لري.
حقشناس لیکلي چې یاد سړک ۲۷٫۸ کیلومتره اوږدوالی او ۹ متره پلنوالی لري او د «خون کوتل» له لارې د اجرستان او مالستان ولسوالۍ سره نښلوي.
د خبرپاڼې له مخې، د یاد سړک په اوږدو کې ۱۵۳ کوچني او لوی پلګوټي او ۵۲۸۶ متره استنادي دېوالونو او د دوه واشونو کار هم شامل دی.
سرچینه زیاتوي چې، د يادو پلګوټو له ډلې د ٤٠ پایې پلګوټو کار بشپړ، ۳۵ پایې پلګوټي تر کار لاندې او د ۷۸ پلګوټورغنیزې چاري به ژر پیل شي.
د «خون کوتل» سړک د غزني ولایت له مهمو مواصلاتي لارو څخه شمېرل کېږي چې په بشپړېدو سره به یې د اجرستان او مالستان ولسواليو سربېره د دايکندي او روزګان ولايتونو د اوسېدونکو د تګراتګ ستونزې هم هوارې شي.