تاند (چهارشنبه د چنګاښ/سرطان ۲۵مه) د روسیې بهرنیو چارو وزارت په افغانستان کې بشري وضعیت کړکېچن او اندېښمنوونکی بللی دی.
د دغه وزارت ویاندې «ماریا زخارووا» ویلي چې په افغانستان د نویو زیږېدلو ماشومانو شمېر په زیاتېدو دی او همدا راز ګوزڼ ناروغي د خپرېدو په حال کې ده.
نوموړې ویلي چې روان کال د افغانستان او پاکستان په سرحدي سیمو کې د پولیو ۲۱ پېښې ثبت شوي او په یادو سیمو کې ډېری کمعمره ماشومان له واکسین پاتې شوي دي.
تر دې وړاندې د روغتیا نړیوال سازمان ویلي وو چې، روان کال په افغانستان کې د پولیو ۲۱ پېښې ثبت شوې دي.
د افغانستان بشري وضعیت هغه موضوع ده چې له تېرو څو کلونو راهیسې د ملګرو ملتونو ګڼو ادارو پرې اندېښنه ښودلې ده.
بل لورته بیا د طالبانو د حکومت عامې روغتیا وزارت ویلي چې دا مهال په ټول هېواد کې چټکو روغتیایي خدمتونو ته د لاسرسي هڅې پیل شوې دي.
دوی ډاډ ورکړی چې په افغانستان کې د بشري وضعیت د ښهکولو لپاره د نړیوالو مرستندویه ادارو په ملاتړ یې اوږدمهاله اقدامات پیل کړي دي.
افغانستان او پاکستان د نړۍ دوه هغه هېوادونه دي چې، لاهم د پولیو له خطرناکه ناروغۍ سره مبارزه کوي او ماشومان یې له دې خطر سره مخ دي.