تاند(چهارشنبه، د چنګاښ/ سرطان ۱۷ مه) د امریکا د مرکزي قوماندانۍ (سینټکام) په یوه خبرپاڼه کې ویلي: «امریکايي ځواکونو پر ایران د پراخو او ځواکمنو بریدونو لړۍ پیل کړې ده.»
سینټکام زیاته کړې چې: «د امریکا دا بریدونه د هغو بریدونو مستقیم غبرګون دی چې ایران په هرمز تنګي کې پر درېیو سوداګریزو کښتیو کړي وو.»
په بیان کې راغلي: «د ایران ښکاره تېری یو بېدلیله او خطرناک اقدام دی او د اوربند د هوکړې څرګنده سرغړونه ګڼل کېږي.»
له بلې خوا، ایراني رسنیو راپور ورکړی چې د سیرک ولسوالي، د قشم ټاپو او بندرعباس په سیمو کې د چاودنو غږونه اورېدل شوي دي.
د مهر خبري اژانس د راپور له مخې، په بندرعباس کې د چاودنو غږونه له لرې واورېدل شول او ښايي دا چاودنې د هرمز تنګي په شاوخوا سیمه کې شوې وي.
دا په داسې حال کې ده چې د راپورونو له مخې، په تېرو ۲۴ ساعتونو کې د هرمز تنګي په سیمه کې پر درېیو کښتیو، د قطر د مایع طبیعي ګاز (LNG) د یوه ټانکر په ګډون، بریدونه شوي دي. دوحې تهران پر ټانکر د برید تور پورې کړی دی.