تاند (سې شنبه د چنګاښ/سرطان ۱۶مه) د افغانستان د کرکټ د ملي لوبډلې پخوانی چټک توپ اچوونکی شاپور ځدراڼ د ورپېښې ناروغۍ له امله ومړ.
که څه هم د شاپور مړینه د هغې کورنۍ او کرکټ بورډ په رسمي ډول نه ده تائید کړې، خو د کرکټ د ملي لوبډلې یو شمېر پخوانیو لوبغاړو او د هغه ملګرو د شاپور مړینه تائید کړې ده.
له دغې ډلې کریم صادق د شاپور ځدراڼ انځور پروفایل کړی او ترڅنګ یې ګڼو نورو لوبغاړو او کرکټ شنونکو هم د شاپور پر مړینه په ټولنیزو رسنیو کې خواشیني ښودلې ده.
شاپور ځدراڼ د افغانستان د کرکټ د ملي لوبډلې یو له هغو چټکو توپ اچوونکو وو چې، د نړۍ په کچه یې افغانستان ته لاسته راوړنې درلودې، خو په وروستیو کې د سرطان په ناروغۍ اخته او هند کې تر درملنې لاندې وو.
د افغانستان د کرکټ ملي لوبډلې پخواني لوبغاړي او د شاپور د یوه وخت د لوبډلې ملګري دولت ځدراڼ هم په خپله فېسبوک پاڼه لیکلي چې، شاپور ځدراڼ د ورپېښې ناروغۍ له امله ومړ.
د کرکټ اړوند ګڼو کورنیو رسنیو هم د شاپور ځدراڼ د مړینې خبر خپور کړی او پرې خواشینې څرګنده کړې ده.
انا لله و انا الیه الراجعون! الله رب دې د فردوس جنتړنه نصیب کړي!