بریالیتوب یوازې د یوه انسان په استعداد، ارادې او نه ستړې کېدونکو هڅو پورې محدود نه دی، بلکې د هغه ټولنیز، اقتصادي او سیاسي چاپېریال هم د بریا په رامنځته کېدو کې مهم او نه جلا کېدونکی رول لري. هر انسان که هر څومره وړ، هوښیار او زحمتکښ هم وي، که په داسې ټولنه کې ژوند وکړي چې بېثباتي، بېعدالتي، فساد او ناسم مدیریت پکې واکمن وي، نو د خپلو موخو ترلاسه کول به ورته له ګڼو خنډونو او ستونزو خالي نه وي.
په ناکامو هېوادونو او وروسته پاتې ټولنو کې بریالی انسان د پرمختګ لپاره له داسې ستونزو سره مخ کېږي چې ډېر وخت یې انرژي، وخت او پانګه له منځه وړي. کمزوری اقتصاد، ناامني، ناسالم اداري نظام، د قانون کمزوری حاکمیت او د فرصتونو نشتوالی هغه خنډونه دي چې د یوه نوښتګر او هڅاند انسان د بریا مخه نیسي. له همدې امله، په ستونزمن چاپېریال کې بریا یوازې د فردي هڅو پایله نه، بلکې د سختو مبارزو، قربانیو او اوږده زغم غوښتنه هم کوي.
په پرمختللو او باثباته ټولنو کې آن هغه کسان چې ځانګړې وړتیا هم ونه لري، د مناسب تعلیمي نظام، قوي اقتصادي بنسټونو، د قانون د حاکمیت او د برابر فرصتونو له امله د پرمختګ ښه امکانات پیدا کوي. کله چې یو وړ انسان په داسې چاپېریال کې ژوند او فعالیت وکړي، د هغه استعداد ته د ودې زمینه برابریږي او په لنډ وخت کې خپلو موخو ته د رسېدو چانس یې څو برابره وده کوي.
د بېلګې په توګه، که یو بریالی سوداګر په یوه ناکامه ټولنه کې پانګونه وکړي، د ناسمو سیاستونو، اداري فساد، د بازار بېثباتۍ او امنیتي ستونزو له امله به هره ورځ د مالي زیان له ګواښ سره مخ وي. خو که همدا سوداګر په یوه بریالۍ او باثباته ټولنه کې فعالیت وکړي، د قانوني ملاتړ، سالم اقتصاد، روڼتیا او مناسب سوداګریز چاپېریال له برکته به وکولای شي په لنډ وخت کې خپل کاروبار پراخ او خپلې موخې ترلاسه کړي.
له همدې امله، که غواړو چې بریالي افراد ولرو، یوازې د اشخاصو پر روزنه بسنه نه کوي؛ بلکې باید د داسې ټولنې د جوړولو لپاره هم کار وکړو چې عدالت، قانون، علم، اقتصادي ثبات او د وړتیاوو درناوی پکې موجود وي. ځکه چې د یوه ملت ریښتینې بریا هغه وخت تضمینېږي چې د فرد استعداد او د ټولنې سالم چاپېریال یو له بل سره ملګرتیا وکړي.
لیکوال: شاه زلمی