تاند (دوشنبه د چنګاښ/سرطان ۸مه) افغان سولې لپاره د امریکا پخوانی ځانګړی استازی، زلمی خلیلزاد وایي چې د پاکستان د تېرې شپې په هوایي بریدونو په زیات شمېر ملکیانو ته مرګ ژوبله اوښتې.
خلیلزاد د پاکستاني پوځ د تېرې شپې بریدونه په کلکه غندلي او په وینا چې له دغو بریدونو ښکاري چې «اسلاماباد» د خبرو له لارې د ستونزو د حل اراده نه لري.
خلیلزاد ویلي چې پاکستان د مذاکراتو له لارې د اختلافاتو د حل په برخه کې د نړیوالې ټولنې او حتا د خپلو خلکو غوښتنې بابېزه ګڼلې او یو ځل بیا یې پر افغان خاوره بریدونه وکړل.
خلیلزاد دا هم ویلي چې «اسلاماباد» تر اوسه د اختلافاتو د سولهییز حل لپاره وړاندېشوو وړاندیزونو او نظرونو ته مثبت ځواب نه دی ورکړی او په دې برخه کې یې هیڅ رغنده اقدام نه دی کړی.
دا په داسې حال کې ده چې، تېره شپه د پاکستان پوځي رژیم په پکتیا، پکتیکا او کونړ ولایتونو کې د ملکي وګړو پر کورونو پراخ هوایي بریدونه وکړل چې په پایله کې لسګونه ملکیان مړه او ژوبل شول.
تر دې وړاندې پخوایي ولسمشر حامد کرزي هم د پاکستان هوایي بریدونه د افغانستان له خصوصي حریم نه ښکاره سرغړونه بللې ده.
حامدکرزی:د پاکستان هوایي بریدونه د افغانستان له ملي حاکمیت ښکاره سرغړونه ده