تاند (یکشنبه د چنګاښ/سرطان ۷مه) د ایران د بهرنیو چارو وزیر عباس عراقچي، د عراق له لوړپوړو چارواکو سره د لیدنې او خبرو لپاره دغه هېواد ته سفر کړی دی.
ایراني رسنیو ویلي چې، عراقچي نن یکشنبه د عراق پلازمېنې بغداد ته رسېدلی دی.
د راپورونو له مخې، د ایران د بهرنیو چارو وزیر به د عراق له چارواکو سره د دواړو هېوادونو پر دوه اړخیزو اړیکو او همدارنګه د سیمې او نړۍ پر وروستیو تحولاتو خبرې وکړي.
ویل کېږي چې د دې سفر د اجنډا له مهمو موضوعاتو څخه یوه هم د ایران د پخواني مشر د جنازې د مراسمو د ترسره کېدو په تړاو له عراقي چارواکو سره همغږي ده.
کارپوهان باور لري چې د ایران د لوړپوړو چارواکو وروستي سیمهییز سفرونه، چې له دې وړاندې د ایران ولسمشر هم پاکستان ته سفر کړی و او اوس د بهرنیو چارو وزیر عراق ته تللی، د دې څرګندونه کوي چې تهران هڅه کوي له ګاونډیو هېوادونو سره خپلې سیاسي او ډیپلوماتیکې اړیکې لا پیاوړې کړي.
د دوی په اند، دغه ډول سفرونه د سیمهییزو همکاریو، اقتصادي اړیکو او د ګډو امنیتي او سیاسي مسایلو د همغږۍ لپاره مهم رول لوبولای شي.