تاند (پنجشنبه د چنګاښ/سرطان ۴مه) افغانستان کې د طالبانو د حکومت مرستیال ویاند حمدالله فطرت له افغانستانه نورو هېوادونو ته د پېښېدونکي ګواښ اندېښنې بې بنسټه وبللې.
هغه زیاته کړې چې، افغانستان د هېڅ هېواد لپاره ګواښ نه دی.
فطرت وایي، دوی چاته اجازه نه ورکوي چې د افغانستان په خاوره کې وسلهوال فعالیت وکړي.
فطرت داسې مهال دا غبرګون ښيي چې،له دې مخکې د ټولیز امنیت تړون غړو هېوادونو ادعا کړې وه چې د افغانستان شمالي پولو کې وسلهوال خوځښتونه موجود دي.
دا لومړی ځل نه دی چې، ځینې هیوادونه له افغانستانه د ځان لپاره د پېښېدونکي ګواښ په تړاو اندېښنې ښيي، تر دې وړاندې په ځلونو دا اندېښنې شریکې شوې دي.
خو طالبانو بیا په ځلونو دا ادعاوې بې بنسټه بللي او ډاډ یې ورکړی چې، دوی به هېڅ چاته د بل ملک خلاف د فعالیت اجازه ورنکړي.
دا اندېښنې افغانستان کې د طالبانو د بیا واکمنېدو وروسته را وروسته زیاتې شوې.