تاند (دوشنبه، د چنګاښ/ سرطان لومړۍ) د ټولګټو وزارت ویلي چې په تېر کال کې په رېلګاډو کې افغانستان ته د بار وړلو کچه د پام وړ لوړه شوې او د وړم کال پرتله ۷۷.۹ سلنه زیاتوالی پکې راغلی دی.
د وزارت په خبرپاڼه کې راغلي چې تېر کال د هېواد په رېللارو ټولټال ۷.۶ میلیون مټریک ټنه توکي لېږدول شوي، چې دا د سوداګریزو فعالیتونو او سیمهییزې سوداګرۍ لپاره پر رېللار د زیاتې تکیې څرګندونه کوي.
د شمېرو له مخې، له دې اندازې څخه ۳۶ زره او ۱۱۹ مټریک ټنه د افغانستان صادرات وو، چې وچې مېوې، وریجې، معدني توکي، کچالو، د انارو جوس او د سبزیجاتو تخمونه پکې شامل وو.
خبرپاڼه زیاتوي چې په رېلګاډو کې د لېږد ډېره برخه وارداتي توکي وو، چې د نفتي او غیرنفتي محصولاتو بارونه یې تر ټولو لویه برخه جوړوله.
د وزارت په وینا، دغه توکي د حیرتان، اقینې او تورغونډۍ بندرونو او همداراز د خواف–هرات په رېللارو لېږدول شوي دي. د خواف–هرات رېللار د سوداګرۍ او ترانزیټ لپاره په یوه مهم دهلېز بدله شوې ده.