تاند (شنبه د غبرګولي/ جوزا ۳۰مه) افغانستان کې د طالبانو د حکومت د کورنیو چارو وزارت ویاند ویلي، چې د هرات د صنعتي ښارګوټي په دوهم فاز کې د نور آریانا د کاغذ او کارتن جوړونې په شرکت کې د شپې په ۳:۱۲ بجو پراخ اور لګېدلی چې، له امله یې میلیونه مالي زیانونه اوښتي دي.
د یاد وزارت ویاند زیاتوي چې، د پېښې له رامنځته کېدو سره سم، د هرات امنیې قوماندانۍ اور وژونکې ډلګۍ پر وخت سيمې ته ورسېدل او اور يې مهار کړ.
سرچینه زیاتوي چې، اور نورو سیمو ته نه دی پرېښودل شوی.
د کورنیو چارو وزارت ویاند عبدالمتین قانع نن شنبه پر ایکس پاڼه په لیکلي پوسټ کې زیاته کړې چې، په دې اور کې کابو ۲۰ میلیونه افغانۍ مالي زیان اوښتی دی.
د قانع په وینا، اطفایې ځواکونو د اغېزمنو او پر وخت هڅو په پایله کې ۶۵۰ میلیونه افغانۍ شتمني د اورل له زیانه وژغورله .
د اور د لګېدو علت نه دی معلوم او د ځاني زیان په اړه هم څه نه دي ویل شوي.