تاند (شنبه د غبرګولي/ جوزا ۳۰مه) افغانستان کې د طالبانو د حکومت د ټولګټو وزارت وایي چې په تېر ۱۴۴۷ هـ ق کال کې د اوسپنې پټلۍ له لارې ټولټال ۷ میلیون ۶۰۲ زره ۴۱۹ مټریک ټنه صادرات او واردات شوي دي.
دغه انتقالات د د حیرتان، آقینې، تورغونډۍ بندرونو او د خواف–هرات له لارې شوي دي.
د یاد وزارت ویاند محمد اشرف حقشناس په اېکسپاڼه لیکلي چې، د حیرتان بندر له لارې ۵ میلیون ۱۶۹ زره ۹۸۵ ټن، د آقینې بندر له لارې ۶۳۵ زره ۴۲۷ ټن، د تورغونډۍ بندر له لارې ۹۱۴ زره ۷۹۶ ټن او د خواف – هرات اوسپنې پټلۍ له لارې ۸۸۲ زره ۲۱۱ ټنه توکي لېږدول شوي دي.
د حق شناس په وینا د یادو انتقالاتو یوه برخه صادرات او ترانزیټ دی، چې په ۱۴۴۷ هـ.ق کال کې ټولټال ۳۶ زره ۱۱۹ ټن سوداګریز توکي ترانزیټ او صادر شوي دي.
نوموړی وایي د صادراتو لویه برخه وچه مېوه، وريجې، کچالو، معدني ډبرې، د هندواڼې تخم، نخود، مس او د انارو جوس دي.
دا ارقام داسې مهال زیاتېږي چې، په ۱۴۴۶ هـ.ق کال کې د همدې څلورو لارو له لارې ۴ میلیونه ۲۷۲ زره ا و۷۱ مټریک ټن انتقالات شوي وو.
د حق شناس په وینا په ۱۴۴۷ هـ.ق کال کې د انتقالاتو کچه د ۱۴۴۶ هـ. ش کال په پرتله ۷۷.۹ سلنه زیاتوالی ښيي.
د طالبانو د حکومت د ټولګټو وزارت ویاند لیکلي چې، دوی هڅه کوي د منظم پلان جوړونې، دوامدارې څارنې، د ترانسپورتي زیربناوو د پراختیا او د خدماتو د ښه والي له لارې سوداګرو ته اړینې اسانتیاوې برابرې کړي.