تاند (شنبه د غبرګولي/ جوزا ۲۴مه) د ننګرهار یو شمېر فعالو ځوانانو په سیند کې د ډوبېدو د مخنیوي په موخه د عامه پوهاوي کمپاین پیل کړی.
د دې کمپاین مسوولان وایي چې، موخه یې په سیند کې د لامبېدونکو ځوانانو او کوچنیانو مخنیوی دی، ځکه د دوی په خبره هره ورځ په سیند کې د لاهو شوي ځوان یا ماشوم یو خبر اوري او پر خواله رسنیو پرې خواشینوونکی پيغامونه ګوري.
د دې کمپاین مشري خبیب امیري کوي.
ده د دې کمپاین پرمهال ستر پیغام په لیکلې بڼه لیکلی چې، وایي: ګرمي مو نه وژني خو سیند مو وژني، هیله ده احتیاط وکړئ.
امیري زیاتوي هر کال د یو شمېر نورو ځوانانو پر مټ دا کمپاین کوي، خو خلک یا د ده کمپاین بابېزه ګڼي او یا سیند کې د ډوبېدو ګواښ ورته عادي ښکاري.
د نوموړي په وینا دی هڅه کوي څو خپل پيغام تر نورو ورسوي او هیله مندي ښيي چې، خلک به یې هم ملاتړ وکړي او د دې چارې مخنیوي کې به هڅه وکړي.
ویل کیږي وروستیو کې ننګرهار کې ۱۵ تنه د لامبو وهلو پر مهال اوبو ډوب کړي دي.
د دې کمپاین ګډونوال له طالبانو هم غوښتنه کوي چې، د سیندونو پر غاړو ګزمې وکړي څو د هغو کسانو مخنیوی وکړي چې، په مرګونو سیندونو کې لامبي.
ننګرهار کې د ګرمۍ د موسم پرمهال د ګرمې هوا له امله ډېری ځوانان سیندونو کې لامبي او د بې احتیاطۍ له امله یې یو شمېر په سیندونو کې ژوند له لاسه ورکوي.