تاند (دوشنبه، د غبرګولي/ جوزا ۱۸ مه) د بلوچستان د کوټې ښار په سنډیمن ملکي (سول) روغتون کې پر ښځینه ډاکټرې ماه نور ناصر د تېزابو له برید وروسته، د ځوانو ډاکټرانو ټولنې (ینګ ډاکټرز ایسوسی اېشن) په ټول ایالت کې د دولتي روغتونونو د او پي ډي او وارډونو د بایکاټ او اعتصاب اعلان کړی دی.
د ځوانو ډاکټرانو ټولنې په یوه بېړنۍ خبري غونډه کې دغه پېښه د روغتونونو د امنیتي تدابیرو ستره ناکامي وبلله او ویې ویل چې په دولتي روغتونونو کې په ځانګړي ډول ښځینه ډاکټرانې له جدي امنیتي ګواښونو سره مخامخ دي.
دوی غوښتنه کړې چې د پېښې په اړه دې بې پرې او په لوړه کچه څېړنه وشي او د روغتونونو امنیت دې پیاوړی کړل شي. د ټولنې په وینا، له بېړنیو خدماتو پرته به نورې ټولې طبي چارې تر بلې خبرتیا پورې بندې وي.
بل لور ته، پولیسو ادعا کړې چې د دې برید اصلي شکمن کس په یوه نښته کې وژل شوی دی. خو ډاکټرانو ټینګار کړی چې یوازې د شکمن کس وژل کېدل بسنه نه کوي او د پېښې ټول اړخونه باید وڅېړل شي.