انوېډیا نوی RTX Spark چیپ معرفي کړ؛ مصنوعي ځیرکتیا به کمپیوټرونو ته مستقیمه راولي
NVIDIA د RTX Spark په نوم نوی چیپ معرفي کړی چې د مصنوعي ځیرکتیا پرمختللې وړتیاوې به نېغ په نېغه لپټاپونو او شخصي کمپیوټرونو ته راولي.
دا پروژه د Microsoft او MediaTek په همکارۍ جوړه شوې او ټاکل شوې د ۲۰۲۶ کال له مني څخه د Dell، HP، Lenovo، ASUS، Microsoft Surface او MSI په محصولاتو کې وکارول شي.
مهمې ځانګړتیاوې
- دا چیپ کولی شي د مصنوعي ځیرکتیا عاملونه (AI Agents) په محلي ډول کمپیوټر پر خپله وچلوي.
- د ډېرو دندو لپاره به د کلاوډ یا ډیټا سنټرونو اړتیا کمه شي.
- شخصي کمپیوټرونه به له دودیزو سافټویرونو څخه په هوښیارو او خپلواکو مرستیالانو بدل شي.
د انوېډیا نوې ستراتیژي
انوېډیا چې تر دې وړاندې د مصنوعي ځیرکتیا د روزنې (Training) د چیپونو په بازار کې مخکښه وه، اوس غواړي د استنتاج (Inference) په چټک وده کوونکي بازار کې هم لویه ونډه ترلاسه کړي. دا هغه برخه ده چې د AI ځوابونو تولید او د ځیرکو عاملونو چلولو ته ځانګړې شوې ده.
د انوېډیا اجرائیه رئیس، یانسین هوانګ د تایوان په کمپیوټکس نندارتون کې وویل چې ۲۰۲۶ کال به د AI عاملونو کال وي، ځکه ټکنالوژي د ساده پوښتنو او ځوابونو له مرحلې د بشپړو اتوماتو سیستمونو پر لور روانه ده.
هغه زیاته کړه چې د Vera پروسېسر او ورسره د تړلي چیپ کورنۍ کولای شي انوېډیا د شاوخوا ۲۰۰ میلیارده ډالرو ارزښت لرونکي بازار ته ورسوي.
د متخصصانو نظر
کارپوهان باور لري چې دا ټکنالوژي ښايي د شخصي کمپیوټرونو لپاره هماغه بدلون رامنځته کړي چې iPhone د سمارټ فونونو او ChatGPT د تولیدي مصنوعي ځیرکتیا لپاره رامنځته کړی و.
خو تر اوسه د AI لرونکو کمپیوټرونو بازار له بېلابېلو غبرګونونو سره مخامخ شوی او ځینو شرکتونو د تمې خلاف د پلور د کمښت خبر ورکړی دی.
د دندو په اړه اندېښنې
جینسن هوانګ هغه ادعاوې رد کړې چې ګواکې مصنوعي ځیرکتیا به د پروګرامرانو دندې له منځه یوسي. د هغه په وینا، دا ټکنالوژي به د تولید وړتیا لوړه کړي او په پایله کې به د سافټویر انجینرانو اړتیا نوره هم زیاته شي.
هوانګ په پای کې یو ځل بیا د تایوان پر مهم رول ټینګار وکړ او ویې ویل چې انوېډیا پلان لري په دې ټاپو کې خپلې پانګونې لا پراخې کړي.