تاند (سېشنبه، د غبرګولي/ جوزا ۱۱ مه) د هند په کوربهتوب د نړیوال کرکټ شورا (ICC) د بورډ په غونډه کې د کرکټ د قوانینو، د ښځینه کرکټ او د غړو هېوادونو اړوند یو شمېر مهمې پرېکړې تصویب شوې.
د غونډې له پرېکړې سره سم، په ټېسټ سیالیو کې به د دواړو لوبډلو په رضا د ګلابي توپ کارولو اجازه وي، چې هدف یې د ورځې او شپې (Day-Night) ټېسټ لوبو لا پراختیا ده.
همداراز، د شکمن بالینګ اکشن د ارزونې پر مهال امپایرانو ته د هاک-آی (Hawk-Eye) معلوماتو ته د لاسرسي اجازه ورکړل شوې، څو پرېکړې لا شفافې او دقیقې شي.
د آیسيسي بورډ د لېګ ساید وایډ ازمیښتي قانون د دایمي کولو پرېکړه هم وکړه، چې له دې وروسته به په رسمي ډول په سیالیو کې پلی کېږي.
د ښځینه کرکټ په برخه کې، پرېکړه شوې چې د ۲۰۲۷ کال د ښځو چمپینز ټرافي به د جون او جولای پر ځای د فبرورۍ له ۱۴ تر ۲۸مې نېټې ترسره شي.
بورډ د اداري بېنظمیو له امله د کاناډا کرکټ غړیتوب وځنډاوه، خو څرګنده یې کړه چې د کاناډا ملي لوبډلې به د دې ځنډ پر مهال هم د آیسيسي په سیالیو کې د ګډون حق ولري.
غونډې د فرنچایز کرکټ د چټک پراخېدو په اړه اندېښنه هم څرګنده کړه او د هغې د اغېزو د ارزونې غوښتنه یې وکړه.
همداراز اعلان وشو چې د آیسيسي دوه استازي به بنګلهدېش ته سفر وکړي، څو هلته د کرکټ د عمومي وضعیت او د بنګلهدېش کرکټ بورډ د ټاکنیز بهیر په اړه له اړوندو لورو سره سلا مشورې وکړي.