تاند (یکشنبه، د غبرګولي/ جوزا ۳ مه) د کندهار ولایت د دامان ولسوالۍ د لوګر پمپ په سیمه کې د ترافیکي پېښې له امله لږ تر لږه شپږ کسان مړه شوي او درې نور ټپیان شوي دي.
د کندهار د امنیه قوماندانۍ ویاند مولوي اسدالله جمشید د شنبې په ورځ ویلي چې دا پېښه هغه مهال وشوه چې یو کرولا موټر له یوه باروړونکي ټرېلر سره ټکر وکړ.
د هغه په وینا، ټول وژل شوي او ټپیان د کرولا موټر سپرلۍ وې.
ټپیان د درملنې لپاره نژدې روغتون ته لېږدول شوي او چارواکو د پېښې په اړه نورې څېړنې پیل کړې دي.
ترافیکي پېښې لا هم د هېواد په ډېرو سیمو کې یوه جدي ستونزه ګڼل کېږي، چې ډېری وخت د بېاحتیاطه موټر چلونې، د سړکونو خراب وضعیت او د ترافیکي قوانینو د نه مراعت له امله رامنځته کېږي.