تاند (جمعه، د غبرګولي/ جوزا لومړۍ) په افغانستان کې د قطر سفیر مردف القاشوطي، د افغانستان د تاریخي نسخو او ارشیفي اسنادو د بیارغونې او ساتنې لپاره د هر اړخیز ملاتړ ژمنه کړې ده.
نوموړي د پنجشنبې په ورځ د افغانستان ملي ارشیف ته لاړ او د دې ادارې بېلابېلې څانګې یې ولیدې.
د ملي ارشیف تخنیکي کارکوونکو القاشوطي ته د ساتل شویو تاریخي اسنادو او آثارو په اړه معلومات ورکړل.
د اطلاعاتو او کلتور وزارت اړوند د ملي ارشیف مشر عبیدالله حنیف وویل، په دې اداره کې د تاریخي اسنادو، خطي نسخو او فرهنګي آثارو بډایه زېرمه شته، چې ډېری یې د بیارغونې او ساتنې بېړنیو چارو ته اړتیا لري.
هغه د افغانستان د تاریخي میراث د خوندي ساتلو لپاره د اړوندو بنسټونو د لا ډېرو همکاریو او مرستو غوښتنه وکړه.
د افغانستان او قطر چارواکو همداراز د دواړو هېوادونو ترمنځ د فرهنګي همکاریو پر دوام ټینګار وکړ.