تاند (دوشنبه د ثور/ غويي ۱۴مه) ننګرهار کې د طالبانو د اطلاعات او کلتور ریاست مسوولان وایي، چې نن یې په جلال اباد ښار سراج العمارت بڼ کې د نارنج ګل دودیزې میلې او مشاعرې ترسراوي ته ترتیبات نیولي دي.
یاد ریاست په یوه خبرپاڼه کې زیاته کړې چې، دغه مشاعره به د سراج العمارت بڼ په کرکټ لوبغالي کې د مازیګر په درې بجو پيلېږي.
خبرپاڼه کې راغلي چې، دې مشاعرې ته د هېواد له بېلابیلو ولایتونو نوموتي شاعران رابلل شوي او له هېوادوالو په ځانګړي ډول له ختیځ مېشتو ته هم په دې مشاعره کې د ګډون بلنه ورکړل شوې ده.
دا مشاعره هر کال د نارنج د ګل د غوړېدو پرمهال په ننګرهار کې ترسره کېږي؛ خو تېر کال په دغه مشاعره کې د خدای بښلي شاعر مطیع الله تراب تر شعر وروسته په هېواد کې طالبانو د مشاعرو په ترسره کېدو هم تر امر ثاني بندیز لګولی وو.
د طالبانو اطلاعاتو او کلتور وزارت خپلو اړونده ټولو ادارو ته امر کړی، چې تر امرثاني پورې به هیڅ ډول مشاعره نه ترسره کوي.
خدای بښلي شاعر مطیع الله تراب د طالبانو مشر ته د شعر په ژبه د را څرګندېدو او کابل ته د راتګ وړاندیز کړی وو او په خپل شعر کې یې له طالبانو غوښتي وو چې لویه جرګه جوړه کړي او د حکومت کولو لپاره له ولس څخه پوښتنې وکړي.