تاند (چهارشنبه د غوئي – ثور ۲مه) افغانستان کې د طالبانو د حکومت د کرنې اوبو لګولو او مالدارۍ وزیر مولوي عطاالله عمري نن چهارشنبه کابل کې د ۱۴۰۵ هجري لمریز کال د بزګر مېلې او د کرنیزو محصولاتو ۳۴م نندارتون کې وویل چې، روان کال به افغانستان د خوراکي توکو له پلوه د نورو له احتیاج ووځي.
عمري زیاته کړې چې، دا د هېواد کرنیز اقتصاد لپاره یو تاریخي پرمختګ دی.
د طالبانو د یاد وزیر په وینا په تېرو پنځو کلونو کې د خوراکي توکو د تولید برخه کې بې ساري اسانتیاوې او بنسټیز بدلونونه راغلي چې د کورنیو تولیداتو د زیاتیدو لامل شوي دي.
نوموړي همدا راز زیاته کړه چې، د لومړي ځل لپاره هېواد ته په لوړ کیفیت توکي واردیږي، د کورني اقتصاد زنځير پیاوړی شوی او په تدریجي ډول افغانستان د خوراکي توکو برخه کې د ګاونډیو هېوادونو له فشار او اړتیا ځان خلاصوي.
نوموړي دا پرمختګونه د ملي ځان بسیاینې پر لور مهم یاد کړ او د دې بهیر د لاپیاوړتیا هیله یې وکړه.