تاند (چهارشنبه، د غويي/ ثور ۲ مه) د ایران د بهرنیو چارو وزارت ویاند اسماعیل بقایي د سې شنبې په ورځ (د غويي/ ثور لومړۍ) وویل چې تر اوسه د پاکستان په مذاکراتو کې د ګډون یا نه ګډون په اړه وروستۍ پرېکړه نه ده شوې.
د ایراني رسنیو د راپورونو له مخې، بقایي ټینګار کړی چې دا ځنډ د بېپرېکړۍ له امله نه دی، بلکې د امریکا له لوري «متضاد پیغامونه، متناقض چلندونه او نه منلو وړ اقدامات» یې اصلي لاملونه دي.
د ایران شرط او د سمندري محاصرې موضوع
ایران مخکې ویلي و چې د خبرو په دوهم پړاو کې د ګډون لپاره یې مهم شرط د خپلو بندرونو پر وړاندې د امریکا د سمندري محاصرې پای ته رسېدل دي. دا محاصره د وري له ۲۲مې راهیسې د ایران د تېلو د صادراتو د بندولو لپاره پیل شوې ده.
د امریکا دریځ او د احتمالي اقدام ګواښ
د امریکا ولسمشر ډونالډ ټرمپ ویلي چې هیله لري له ایران سره یوې «لویې هوکړې» ته ورسېږي، خو د اوربند د غځولو لېوالتیا نه لري. هغه خبرداری ورکړی چې که خبرې بېپایلې پاتې شي، د امریکا پوځ «په بشپړه توګه د اقدام لپاره چمتو دی».
د خبرو وضعیت او امنیتي تدابیر
په ورته وخت کې، د امریکا د ولسمشر مرستیال جې ډي ونس، چې ټاکل شوې د امریکايي پلاوي مشري وکړي، تر اوسه اسلام اباد ته نه دی تللی. د راپورونو له مخې، د اسلام اباد ښار په مرکزي برخه کې سخت امنیتي تدابیرو غوره شوي او د خبرو د کوربتوب لپاره یو لوکس هوټل هم تخلیه شوی دی.
د سپینې ماڼۍ یوه چارواکي ویلي چې ونس به د سېشنبې په ورځ په واشنګټن کې په نورو غونډو کې ګډون وکړي.
د اوربند پای ته رسېدا
د امریکا او اسراییل ترمنځ له ایران سره اوربند د تهران پر وخت د چهارشنبې په سهار پای ته رسېږي، که څه هم ټرمپ ویلي چې دا اوربند به د امریکا پر وخت د چهارشنبې په ماښام ختم شي. د امریکا د چهارشنبې ماښام د تهران د پنجشنبې له سهار سره برابرېږي.