تاند (چهارشنبه، د غويي/ ثور ۲ مه) ټاکل شوې ده چې د «کاسا–۱۰۰۰» پروژې د افغانستان برخه د ۲۰۲۷ کال په پسرلي کې بشپړه شي او د همدې کال په دوبي کې یې سوداګریز فعالیتونه پیل شي.
د قزاقستان د «قازاینفورم» خبري اژانس د سې شنبې (د غويي لومړۍ) د راپور له مخې، د دې سیمهییزې پروژې د پرمختګ موضوع د اپرېل له ۱۸مې تر ۲۰مې پورې د تاجکستان په پلازمېنه دوشنبې کې د یوې غونډې پر مهال وڅېړل شوه. په دې غونډه کې د افغانستان برېښنا شرکت، د نړیوال بانک استازو او د «کاماني انجینرۍ» شرکت استازو ګډون کړی وو.
د تاجکستان د انرژۍ وزیر، دلېر جمعه، د دې پروژې پر ستراتیژیک اهمیت ټینګار وکړ او ویې ویل چې «کاسا–۱۰۰۰» نه یوازې سیمهییزه همکاري پیاوړې کوي، بلکې د ګډون کوونکو هېوادونو ترمنځ باور زیاتوي او د چاپېریال له پلوه د پاکې برېښنا د صادرولو زمینه برابروي.
د راپور له مخې، په قرغیزستان، تاجکستان او پاکستان کې د پروژې ساختماني چارې بشپړې شوې دي، خو په افغانستان کې لا هم کار روان دی.
د تاجکستان د انرژۍ وزارت په خبرپاڼه کې راغلي چې د نوې طرحې له مخې به د افغانستان اړوند کارونه د ۲۰۲۷ کال تر پسرلي پورې پای ته ورسېږي او په همدې کال کې به د پروژې سوداګریز فعالیتونه پیل شي.
یاد وزارت زیاته کړې چې د دې مهمې سیمهییزې پروژې بشپړېدا به د انرژۍ بازار ته وده ورکړي، د برېښنا امنیت به پیاوړی کړي او د ګډون کوونکو هېوادونو ترمنځ به اقتصادي همکاري پراخه کړي.
له دې وړاندې هم راپور ورکړل شوی و چې ازبکستان، افغانستان او قرغیزستان د یوه ګډ کاري ټیم پر جوړولو هوکړه کړې، څو د ترانزیټ، سوداګرۍ او د افغان تولیداتو د صادراتو بهیر اسانه کړي.