تاند (چهارشنبه، د غويي/ ثور ۲ مه) د پاکستان حکومت وايي چې لا هم د ایران له لوري له امریکا سره د سولې په خبرو کې د ګډون په اړه د رسمي ځواب په تمه دی، په داسې حال کې چې په سیمه کې امنیتي او اقتصادي وضعیت لا پسې پېچلی شوی دی.
د پاکستان د اطلاعاتو وزیر عطاالله تارړ د سېشنبې په ورځ وویل چې اسلاماباد د منځګړي په توګه له ایران سره پرلهپسې تماسونه لري او هڅه کوي د ډیپلوماسۍ او خبرو لړۍ روانه وساتي.
هغه زیاته کړه چې د ایران پرېکړه، چې ایا د اوربند له پای ته رسېدو مخکې به په خبرو کې ګډون وکړي که نه، ډېره مهمه ده.
د هغه په وینا، د امریکا او اسراییلو له لوري له ایران سره شوی اوربند د ګرینویچ پر وخت د سېشنبې په ماښام پای ته رسېږي، خو د امریکا ولسمشر ډونالډ ټرمپ بیا ویلي چې دا اوربند به د امریکا د ختیځ پر وخت د چهارشنبې په ماښام (د ایران د پنجشنبې په سهار) ختم شي.
په هرمز تنګي کې د تګ راتګ کموالی
په ورته وخت کې، د سمندري تګ راتګ تازه معلومات ښيي چې د هرمز تنګي له لارې د کښتیو تېرېدا کابو په ټپه درېدلې ده. د سې شنبې د ورځې راپورونه وايي چې په تېرو ۲۴ ساعتونو کې یوازې درې بېړۍ له دې مهمې سمندري لارې تېرې شوې دي.
دا وضعیت وروسته له هغه رامنځته شوی چې د امریکا سمندري ځواکونو د ایران پر بندرونو بندیزونه لګولي، چې د تهران سخت غبرګون یې راپارولی دی. ایران هم په ځواب کې پر هرمز تنګي محدودیتونه ساتلي دي.
هرمز تنګی د نړۍ له مهمو سمندري لارو څخه ګڼل کېږي، چې عموماً د نړۍ شاوخوا پنځمه برخه تېل او مایع ګاز له همدې لارې لېږدول کېږي.
د کښتیو د تعقیب د معلوماتو له مخې، یوه تېلوړونکې بېړۍ چې څرګند بیرغ یا مالکیت یې نه درلود، له یوه عراقي بندر څخه تر وتلو وروسته د سېشنبې په ورځ له هرمز تنګي تېره شوې ده.
د خبرو راتلونکی
په داسې حال کې چې سیمه له سیاسي او پوځي فشارونو سره مخامخ ده، د ایران وروستۍ پرېکړه به له امریکا سره د خبرو راتلونکی مسیر وټاکي—هغه خبرې چې کولی شي د کړکېچ د کمېدو یا لا زیاتېدو سبب شي.