د روسیې د باندنیو چارو وزیر سرګی لاوروف، وايي، د افغانستان وضعیت او د منځني ختیځ روان کړکېچ نه یوازې پر نژدې سیمو، بلکې پر ټولې سیمې، په ځانګړي ډول پر منځنۍ اسیا اغېز کوي.
هغه د ډله ییز امنیتي تړون سازمان د پارلماني شورا په غونډه کې وویل چې د افغانستان د شاوخوا سیمو بېثباتي، له فارس خلیج سره د کړکېچ تر څنګ، د قفقاز، منځنۍ اسیا او د کسپین سمندرګي سیمو امنیت هم اغېزمن کړی دی.
د ګواښونو زیاتوالی او د مبارزې دوام
لاوروف زیاته کړه: «په اوراسیا کې ګواښونه مخ پر زیاتېدو دي او لا ډېرو هڅو ته اړتیا ده. هغه هېوادونه چې د جګړې او تاوتریخوالي له لارې د برلاسۍ هڅه کوي، نوي ګواښونه رامنځته کوي.»
د هغه په خبره، په افغانستان کې د ترهګرۍ او د نشهيي توکو د قاچاق پر ضد مبارزه لا هم روانه ده—هغه دوه مسلې چې روسیه یې له جدي اندېښنو څخه بولي.
د امنیتي همکارۍ پراخول
د روسیې د بهرنیو چارو وزیر ډاډ ورکړ چې مسکو به له خپلو متحدانو سره د ډله ییز امنیتي تړون سازمان په چوکاټ کې د نړیوال امنیت د ستونزو د حل لپاره خپلې هڅې زیاتې کړي.
روسیې د روان میلادي کال له جنورۍ راهیسې د دې سازمان مشري پر غاړه لري، او د لاوروف په وینا، دا هېواد به د ګډو امنیتي ګواښونو پر وړاندې د همغږۍ او همکارۍ کچه لا لوړه کړي.