تاند (شنبه د وري – حمل ۲۹مه) د امریکا ولسمشر ډونلډ ټرمپ په ټینګار سره ویلي چې، د هر احتمالي سولې تړون له مخې به بډایه شوي یورانیم له ایران څخه امریکا متحده ایالاتو ته ولېږدول شي.
ټرمپ زیاتوي، چې واشنګټن به له تهران سره له هغو اټومي بنسټونو د دغو موادو په رایستلو کې مرسته وکړي چې تېر کال ویجاړ شوي دي.
ټرمپ دا څرګندونې د امریکا د محافظهکار غورځنګ په یوه غونډه کې، چې د فونېکس په اریزونا کې ترسره شوې وه کړې دي.
ټرمپ ویلي: «موږ به ډېرو لویو برمو ته اړتیا ولرو موږ به دا له ایران سره په ګډه راوباسو او ډېر ژر به یې امریکا ته بېرته ولېږدوو.»
ایران بیا د ټرمپ دې څرګندونو ته تر اوسه غبرګون نه دی ښودلی.