تاند (شنبه د وري – حمل ۲۹مه) افغانستان کې د طالبانو د حکومت د کورنیو چارو وزارت له نشهیي توکو سره د مبارزې پلاوی د نشهیي توکو نړیوالو ګواښونو ناسته کې د ګډون په موخه ازبکستان ته سفر کړی.
د دغه پلاوي مشري د یاد وزارت له نشه یي توکو سره د مبارزې معین شیخ عبدالرحمن منیر کوي.
د طالبانو کورنیو چارو وزارت لیکلي، ټاکل شوې دغه ناسته د روانې میلادي میاشتې په ۲۰مه نېټه د بېلابېلو هېوادونو استازو په شتون کې جوړه شي.
ویل کیږي دغې ناسته کې به د نشهیي توکو نړیوال ګواښونه وڅېړل شي او د سیمهییزو او نړیوالو همکاریو په لارو چارو به هر اړخیز بحثونه وشي.
افغان پلاوی به یاده ناسته کې نشهیي توکو سره د مبارزې برخه کې د طالبانو لاسته راوړنې او راتلونکي پروګرامونه ګډونوالو سره شریک کړي.