تاند (یکشنبه، د وري/ حمل ۲۳ مه) راپورونه ښيي چې د ایران او امریکا ترمنځ خبرې په اسلاماباد کې د یکشنبې تر سهاره پورې دوام لري؛ هغه خبرې چې د پاکستان په منځګړتوب او د جدي اختلافونو په فضا کې روانې دي.
تسنیم خبري آژانس تېره شپه ناوخته راپور ورکړ، د ایران او امریکا د مذاکراتو پلاوو له څو ساعتونو راهیسې د پاکستاني چارواکو په حضور کې د پاکستان په پلازمېنه کې د درې اړخیزو خبرو نوی پړاو پیل کړی دی.
د راپور پر بنسټ، که څه هم لومړنۍ ناسته ترسره شوې، خو وروسته خبرې په غیرمستقیم ډول او د دواړو لورو ترمنځ د پیغامونو د تبادلې له لارې، د پاکستاني منځګړو په وسیله تعقیب شوې دي.
راپورونه وايي، دا مذاکرات چې تر ناوخته دوام یې کړی، په داسې حال کې روان دي چې اختلافات—په ځانګړي ډول د هرمز تنګي پر سر—لا هم د ګډ چوکاټ د رامنځته کېدو مخه نیسي.
تسنیم خبري آژانس د خپلو سرچینو په حواله ویلي چې د امریکا لوري «تر اندازې زیاتې غوښتنې» د خبرو د پرمختګ یو مهم خنډ دی، او زیاتوي چې دا پړاو ښايي د لومړني توافق د ترلاسه کولو وروستی فرصت وي.
په همدې حال کې، د دې آژانس په وینا، لا هم روښانه نه ده چې خبرې به بلې ورځې ته (دوشنبې) وغځول شي او که پلاوي به د سلا مشورو لپاره خپلو پلازمېنو ته ستانه شي.