تاند (دوشنبه، د وري/ حمل ۱۷ مه) په خواله رسنۍ کې د ایران مشرانو ته د امریکا د ولسمشر ډونالډ ټرمپ له سپکو سپور ډک او ګواښونکي پوست نړیوال شنونکي حیران او اندېښمن کړي دي.
امریکايي ټلویزیوني چاینل سي این این ویاند پینا دنګ د ټرمپ پر ګواښونو حیرانتیا ښکاره کړه او ویې ویل چې پر برېښناکوټونو او بنسټیزو تاسیساتو باندې بریدونه د جنګي جرم ګڼل کېږي.
له بلې خوا د نیویارک ټایمز خبریال زولان وویل چې د ولسمشر ټرمپ خبرې متضادې دي.
د نړیوالو چارو کارپوه بریټ مک ګارک وویل چې د داسې ژبې کارول به ټرمپ ته د کوم جوړجاړي لار نه پرانیزي.
په سکای نیوز کې شنونکې ټیرا کینګارلو وویل چې دا ډول څرګندونې د ټرمپ مایوسي ښيي، او زیاته یې کړه چې د ټرمپ کړنو ایران نور هم زړور کړی دی.
هغې وویل چې د ایراني مشرانو لپاره مرګ د ویاړ نخښه ګرځېدلې، په داسې حال کې چې ټرمپ هر څه د معاملې (سودا) له نظره ګوري.
د کارګرانو د اتحادیې مشر هوورډ بیکټ وویل چې ټرمپ اوس د هماغه هرمز تنګي په اړه اندېښمن دی، چې څو ورځې مخکې یې په اند امریکا ته کوم اهمیت نه درلود.
هغه زیاته کړه چې د ټرمپ ګواښ د جګړې جرم دی، او باید په امریکا کې نظام بدل شي او ټرمپ نړیوالې جزايي محکمې (هاګ) ته وړاندې شي.