تاند (پنجشنبه، د وري/ حمل ۱۳ مه) د رویټرز او اسوشیتید پریس خبري اژانسونو د راپور له مخې، پاکستاني چارواکو نن (پنجشنبې) وویل چې له افغانستان سره د دوی د پلاوي خبرې روانې دي.
د پاکستان د باندنیو چارو وزارت ویندوی رویټرز خبري اژانس ته ویلي چې دا خبرې د چین په شمال لویدیځ ښار ارومچي کې د دواړو هېوادونو د جګپوړو چارواکو ترمنځ ترسره کېږي.
پرون ځینو پاکستاني رسنیو د خپل هیواد د چارواکو په قول ویلي و چې د ارومچي خبرې، چې د چین په منځګړتوب پیل شوي، بې نتیجې پای ته رسېدلې دي. خو نن د پاکستان د باندنیو چارو وزارت د ویندوی ترڅنګ د دغه هیواد دوو نورو چارواکو اسشیتید پریس خبري اژانس ته ویلي چې د پاکستان او طالبانو ترمنځ خبرې په چین کې نن پنجشنبه (۱۳ حمل) پیلېږي.
د طالبانو چارواکو هم ویلي چې نن د دواړو خواوو ترمنځ خبرې پیلېږي او پرون د دواړو هیوادونو پلاوي ارومچي ته رسېدلي وو.
له دې خبرو سره هممهاله پاکستان د افغانستان پر خاوره یې د درنو وسلو ډزې وکړې چې په نتیجه کې یې یو تن وژل شوی او څو نور، چې اکثره ماشومان دي، ژوبل شوي دي.
د طالبانو یوه چارواکي، چې نه یې غوښتل نوم یې څرګند شي، اسوشیټډ پرېس ته ویلي چې د دوی پنځه کسیز پلاوی د ارومچي په خبرو کې ګډون لري.
د هغه په وینا، په دې پلاوي کې دوه کسان د بهرنیو چارو وزارت، یو د دفاع وزارت، یو د کورنیو چارو وزارت او یو هم د استخباراتو ادارې استازي دي.