تاند (یکشنبه، د وري/ حمل ۹ مه) د متحده عربي اماراتو (صوت الامارات) ویبپاڼې نن راپور ورکړ؛ د پاکستان حکومت اعلان کړی چې د مارچ په ۳۱مه به د افغانستان له مشرانو سره خبرې وکړي. د دې اقدام موخه د دواړو هېوادونو ترمنځ د زياتېدونکو کړکېچونو کمول او د امنيتي او سياسي همکارۍ د پياوړتيا د لارو لټول دي.
رسمي سرچينو تاييد کړې چې په راتلونکې غونډه کې به د دواړو خواوو جګپوړي چارواکي ګډون وکړي. پر شمېر لانجمنو موضوعاتو به تر بحث وشي، چې تر ټولو مهم يې سرحدي امنيت او د وسلهوالو ډلو پر ضد مبارزه ده. دا غونډه به د کډوالو مسئلې او د دواړو هېوادونو ترمنځ سوداګرۍ ته هم ځانګړې پاملرنه وکړي.
صوت الامارات د خپلو سرچینو نوم نه دی ښوولی خو لیکلي یې دي؛ دا ګام په داسې حال کې اخيستل کېږي چې په دې وروستيو کې د دواړو هېوادونو ترمنځ اړيکې ډېرې ترینګلې شوي او د شدیدو نښتو سبب شوي دي.
ویبپاڼه زیاتوي، همدې حالت اسلامآباد اړ کړی چې خپلې ډيپلوماټيکې هڅې ګړندۍ کړي څو بحران کنټرول کړي.
څارونکي باور لري چې دا راتلونکې خبرې اترې د دواړو لورو ترمنځ د باور د بيا رغونې لپاره يو مهم فرصت دی. همداراز به دا د همغږۍ د ګډو ميکانيزمونو په جوړولو کې مرسته وکړي چې د سيمې ثبات ته ملاتړ برابروي، په ځانګړي ډول هغو امنيتي ننګونو ته په کتو چې د دواړو هېوادونو ګډ سرحد ورسره مخامخ دی.
ویبپاڼه وايي، تمه کېږي چې دا غونډه به لومړني تفاهمونه رامنځته کړي او د نورو راتلونکو ناستو لپاره به لاره هواره کړي، څو د پراخو هڅو په چوکاټ کې د سيمې ثبات پياوړی او د دواړو هېوادونو ترمنځ کړکېچونه راکم شي.
د افغانستان د طالبانو حکومت او اسلام اباد تراوسه په دې اړه رسماً څه نه دي ویلي. خو پاکستان د جرګو په شکل هڅې پیل کړي دي. پاکستاني رسنیو ویلي چې د دې ډول جرګو لومړۍ به د سې شنبې په ورځ په پېښور کې جوړه شي.
د افغانستان او پاکستان ترمنځ د سولې او خبرو لپاره د دوو خواوو ګډه جرګه جوړېږي