راپور: محبوب الله خان
پل فرهنګي او کلتوري ټولنې په برلین کې پسرلنی جشن او نوروز ونمانځه.
پل فرهنګي او کلتوري ټولنې د جرمني په پلازمېنه برلین کې له هومبولټ فورم او یو شمېر نورو فرهنګي موسسو سره په ګډه د مارچ پر ۲۱ نېټه د ۱۴۰۵ لمریز کال لومړۍ ورځ یا نوروز د بېلا بېلو فرهنګي پروګرامونو په وړاندې کولو سره ونمانځه.
د نوروز جشن په برلین کې د جرمني د فرهنګي مرکز هومبولټ فورم په تاریخي ودانۍ او موزیم کې د افغانستان، ایران، ازبکستان او کردستان فرهنګي موسسو، فرهنګي ټولنو او هنرمندانو دوديزه موسیقي، دودیزې نڅاوې، د نوروز په اړه فرهنګي بحثونه او همدارنګه د سیمه ییزو خوړو او فرهنګي توکو نندارتونونه او شمېر نور فرهنګي پروګرامونه ترسره کړل.
له یاد جشن څخه د جرمني، اروپايي هېوادونو ، د نوروز حوزې هېوادونو او افغانانو په ګډون تر پنځه زرو (۵۰۰۰) زیاتو مېرمنو، نارینه وو او ماشومانو لیدنه وکړه.
د پل فرهنګي او کلتوري ټولنه چې له تېر یوه کال راهیسې د جرمني په برلین کې فرهنګي فعالیت کوي په همدې جشن کې فعاله ونډه واخسیته او د افغانستان استازیتوب یې وکړ.
د نوروز په فرهنګي جشن کې د پل فرهنګي او کلتوري ټولنې فعالو غړو او یو شمېر افغان هنرمندانو بېلا بېل فرهنګي پروګرامونه وړاندې کړل.
د یادونې وړ ده چې د پل فرهنګي ټولنې غړو د جشن په ترڅ کې ګډونوالو ماشومانو ته نکریزې کېښودې، افغاني سمنک او خواږه يې هم ووېشل. دغه پسرلنی جشن د ماښام په نهو بجو پای ته ورسیده. پل فرهنګي او کلتوري ټولنه هڅه کوي چې په راتلونکې کې په جرمني او نورو هېوادونو کې د افغانې کلتور د ودې او پراختيا په اړوند فرهنګي، ټولنيز او ادبي فعاليتونه تر سره کړي.