تاند (جمعه، د کب/ حوت ۱۹ مه) کاناډا د افغانستان او پاکستان له حکومتونو وغوښتل چې د تاوتریخوالي د دوامداره کمېدو لپاره کار وکړي.
د کاناډا د بهرنیو چارو وزارت په یوه بیان کې چې پر ایکسپاڼه (پخواني ټویټر) یې خپور کړی، د افغانستان او پاکستان ترمنځ د موقت اوربند هرکلی کړی او ویلي، کاناډا د کړکېچ د کمولو د هڅو ملاتړ کوي او پر دواړو لورو غږ کوي چې دې وقفې ته دوام ورکړي.
په بیان کې راغلي: «موږ د لنډمهاله وقفې د اعلان هرکلی کوو او له دواړو خواوو غواړو چې د تاوتریخوالي د د دوامداره کمېدو لپاره خپلې هڅې جاري وساتي.»
کاناډا همداراز د دې جګړې له امله د ملکي وګړو پر وضعیت اندېښنه څرګنده کړې او ویلي یې دي چې د ملکي مرګ ژوبلو د زیاتېدو په اړه «ژوره اندېښنه» لري.
د سعودي عربستان، قطر او ترکیې په غوښتنه د افغانستان او پاکستان ترمنځ موقت اوربند د سیمې او نړۍ د ګڼو هیوادونو له هرکلي سره مخامخ شوی دی.