تاند (سې شنبه، د کب/ حوت ۲۶ مه) چین د سې شنبې په ورځ بې له دې چې په کابل کې د پاکستان خونړۍ بمباري وغندي، له پاکستان او افغانستان څخه وغوښتل چې له زغم څخه کار واخلي او بېرته خبرو اترو ته وګرځي.
د افغانستان حکومت د دوشنبې په ورځ ناوخته ادعا وکړه چې د پاکستان هوايي بریدونو د شپې شاوخوا ۹ بجې په کابل کې د «امید د اعتیاد درملنې روغتون» په نخښه کړی، چې شاوخوا ۲۰۰۰ بستره لري، او لږ تر لږه ۴۰۰ کسان پکې وژل شوي دي.
خو پاکستان دا تورونه رد کړل او ویې ویل چې په کابل او ننګرهار ولایت کې یې پوځي تاسیسات او د مهماتو زېرمې په نخښه کړې دي.
د کابل او اسلاماباد دا ادعاوې تر اوسه په خپلواکه توګه نه دي تایید شوي.
د چین دریځ
د تاوتریخوالي د زیاتېدو په غبرګون کې د چین د بهرنیو چارو وزارت ویاند لین جیان وویل چې بیجینګ هیله لري دواړه خواوې له نورو شخړو څخه ډډه وکړي او د خبرو اترو لاره خپله کړي.
لین جیان په بیجینګ کې خبریالانو ته وویل:
«افغانستان او پاکستان ګاونډیان دي او تل به ګاونډیان پاتې شي. د دواړو هېوادونو ترمنځ د ستونزو د حل یوازینۍ عملي لاره خبرې او مذاکرات دي.»
هغه زیاته کړه:
«چین هیله لري چې دواړه هېوادونه ارام پاتې شي، له زغم څخه کار واخلي او ژر تر ژره مخامخ خبرې پیل کړي څو خپل اختلافونه د خبرو له لارې حل کړي.»
هغه وویل چې چین له دواړو لورو غوښتي چې د چینايي وګړو، ادارو او پروژو امنیت ډاډمن کړي، او بیجینګ به د تاوتریخوالي د کمولو لپاره خپلو هڅو ته دوام ورکړي.
د افغانستان او پاکستان ترمنځ وروستي تاوتریخوالی
د افغانستان او پاکستان اړیکې په وروستیو اوونیو کې وروسته له هغه ترینګلې شوې چې سرحدي تاوتریخوالی زیات شو او دواړو لورو ته یې مرګ ژوبله او مالي زیانونه واړول.
د فبرورۍ له وروستیو راهیسې د پولې دواړو غاړو ته په نښتو کې لږ تر لږه ۱۰۷ کسان وژل شوي دي، چې پکې په پاکستان کې ۱۳ سرتېري او ۵ ملکي وګړي شامل دي او یو سرتېری لا هم ورک دی.
د کابل د تېرې شپې له خونړۍ حملې مخکې د کابل د معلوماتو له مخې، په افغانستان کې ۱۳ سرتېري او ۷۶ ملکي وګړي وژل شوي دي.
د ملګرو ملتونو د معلوماتو له مخې، د فبرورۍ له ۲۶مې د مارچ تر ۵مې پورې په افغانستان کې د غیرمستقیمو ډزو او هوايي بریدونو له امله ۱۸۵ ملکي کسانو ته مرګ ژوبله اوښتې، چې پکې ۵۶ کسان وژل شوي دي.
د کابل تر حملې مخکې د چین هڅې
د چین د بهرنیو چارو وزیر وانګ يي هم له خپلو پاکستاني او افغان سیالانو سره جلا جلا ټیلیفوني خبرې کړې او له هغوی یې د زغم غوښتنه کړې ده.
چین همداراز خپل ځانګړی استازی یوی شیاویونګ سیمې ته لېږلی چې له دواړو لورو سره خبرې وکړي.
د هند غبرګون
په همدې حال کې هند ویلي چې په کابل کې د یاد مرکز پر وړاندې د پاکستان د راپور شوي هوايي برید «په کلکه غندي».