تاند (سه شنبه د کب – حوت ۱۹مه) د ملګرو ملتونو په امنیت شورا کې د چین استازي د ډېورنډ فرضي کرښې په اوږدو کې د کابل او اسلاماباد ترمنځ د وروستیو نښتو له امله اندېښنه څرګنده کړې او له دواړو خواو یې د زغم غوښتنه کړې ده.
د چین دایمي استازي فوکونګ افغانستان اړه د امنیت شورا غونډې ته زیاته کړې چې بیجینګ غواړي د افغانستان او پاکستان ترمنځ د دغو ترینګلتیاو د پایته رسولو په برخه کې رغنده رول ولوبوي.
د چین استازي دغه راز پر طالبانو غږ کړی چې کابل کې د چینایانو پر هوټل د برید په اړه پلټنې وکړي او عاملینو ته یې سزا ورکړي.
نوموړي ویلي چې طالبان باید له خپلو ګاونډیو هېوادونو سره په ګډه د ترهګریزو ګواښونو د له منځه وړلو او د سیمې د امنیت او ثبات لپاره کار وکړي.
په ورته مهال بیا په ملګرو ملتونو کې د روسیې دایمي استازی واسلي نبنزیا وایي، که څه هم د طالبانو حکومت د ترهګرۍ پر وړاندې مبارزه کوي، خو افغانستان کې د داعش خراسان ډلې حضور لا هم اندېښنې راپورته کړي دي.
واسلي نبنزیا افغانستان په اړه د ملګرو ملتونو د امنیت شورا په غونډه کې ویلي چې بهرني ترهګر او له بهره یې تمویل افغانستان بېثباته کوي.
د روسیې استازي زیاته کړې، که څه هم طالبانو د کوکنارو د کښت د له منځه وړلو هڅې کوي، خو په افغانستان کې د مصنوعي نشه یي توکو تولید زیات شوی او په دې برخه کې نړۍوال ملاتړ خورا مهم دی.
هغه زیاته کړې چې مسکو په افغانستان کې د بشري حقونو، په ځانګړې توګه د نجونو د زدهکړو او د یوه ټولګډوني حکومت د جوړېدو مسلې څاري او تمه لري چې دواړو برخو کې پرمختګونه رامنځته شي.
امریکا، افغانستان د ناسمو نیونو د ملاتړو هېوادونو نوملړ کې شامل کړ