تاند (یکشنبه، د کب/ حوت ۳ یمه) په یوه څېړنه کې څرګنده شوې چې عمر یوازې د کلونو شمېرې یا عددونه دي خو حقیقت دا دی چې ټول خلک په یو ډول نه زاړه کېږي. کېدای شي یو څوک په کاغذ کې ۶۰ کلن وي، خو بدن یې د ۳۰ کلن ځوان په شان کار وکړي، او برعکس، ځینې خلک په کم عمر کې دننه ډېر زاړه شوي وي.
د جنوبي کلیفورنیا پوهنتون د څېړونکو په دې څېړنه کې د شاوخوا ۴ زره کسانو عمر او د بدن واقعي حالت (بیولوژیکي عمر) وڅېړل شو. ساینسپوهانو د خلکو DNA ته وکتل او دا یې معلومه کړه چې جینونه څنګه فعال یا غیرفعال کېږي.
پایلې ډېرې حیرانوونکې وې:
- یو ۶۶ کلن کس د بدن له پلوه ۱۱۴ کلن و
- یو بل ۵۹ کلن کس د بدن له مخې یوازې ۲۳ کلن ښکارېده
څېړنه ښيي چې:
- ښځې عموماً د سړیو پرتله ۱–۲ کاله ځوان بیولوژیکي عمر لري
- چاغوالی، سګرېټ څکول، خراب ماشومتوب او ټولنیز فشارونه د بدن د ژر زړېدو مهم لاملونه دي
- ښه یا بد ژوند، احساساتي فشار او ټولنیزې تجربې د انسان د عمر پر بهیر اغېز لري
ساینسپوهان وايي:
خلک په یو ډول نه زاړه کېږي؛ د ژوند تجربې کولای شي انسان ژر یا ورو زاړه کړي.
پایله:
که څه هم د انسان د زیږون له مخې عمر لوړېږي، خو د سالم ژوند، ښو عادتونو او مثبت فکر له لارې انسان کولای شي دننه ځوان پاتې شي.
لکه څنګه چې مشهور سندرغاړي باب ډېلن (د نوبل جایزې ګټونکی) ویلي:
کېدای شي عمر دې زیات وي، خو زړه دې تل ځوان پاتې شي.