تاند ( پنج شنبه د سلواغې ـ دلوې ۲۳مه) د طالبانو د حکومت مالیې وزارت وایي، چې د اقتصادي کمېسیون د پرېکړې او د دوی د مشر ملا هبت الله د حکم پر اساس د افغانستان او سعودي عربستان ترمنځ د اقتصادي همکاریو ګډ کمېسیون بیا فعالېږي.
یاد وزارت زیاته کړې چې، د دې کار لپاره عملي ګامونه هم اخیستل شوي دي.
په دې تړاو خپره شوې خبرپاڼه کې راغلي، چې د دغې پرېکړې له مخې، د مالیې وزارت په مشرۍ د وزارتونو او ادارو باصلاحیته استازي او همداراز د خصوصي سکتور استازي د «افغان – سعودي» ګډ اقتصادي کمېسیون د غړو په توګه ټاکل شوي دي.
خبرپاڼه کاږي چې په همدې تړاو، د روانې اونۍ په ترڅ کې د افغانستان له لوري ټاکل شوو غړو د مالیې وزارت په مقر کې لومړنۍ ناسته وکړه.
دغه ناسته د ګډ کمېسیون له لارې د راتلونکو فعالیتونو او دوهاړخیزو تعاملاتو د څرنګوالي په اړه د داخلي سلا مشورو په موخه جوړه شوې وه.
خبرپاڼه کې راغلي چې، د دې غونډې په پای کې پرېکړه وشوه چې د اړوندو ادارو او خصوصي سکتور په همغږۍ به د طالبانو او د سعودي عربستان شاهي دولت ترمنځ د ګډ اقتصادي کمېسیون د رسمي ناستې د ترسره کېدو لپاره لازم چمتووالی ونیول شي.