تاند ( پنج شنبه د سلواغې ـ دلوې ۲۳مه) ملا برادر د کابل-بګرام سړک د جوړېدو چارو د پيل په مراسمو کې ویلي، چې هېوادونه دې له کابل سره د رسمي اړیکو په اډانه کې «د تعامل» وکړي.
د ریاستالوزرا اقتصادي مرستیال ویلي، چې افغانستان د ټولو افغانانو کور دی او دوی دومره «کم ظرفیته» نه دي، چې «جزوي مسایل» جدي ونیسي.
نوموړي نن د پنجشنبې په ورځ، د سلواغې پر ۲۳مه د کابل – بګرام سړک د چارو د پیل په مراسمو کې یاد سړک د کابل ښار له مهمو نښلوونکو لارو وباله او زیاته یې کړه، چې دغه سړک کابل ښار له پروان او نورو شمالي ولایتونو سره نښلوي.
ملا برادر ویلي چې، دا سړک د نوي کابل ښار له اساسي ترانسپورټي زېربناوو څخه دی، چې د ښاري پراختیا، ټولنیزو فعالیتونو او اقتصادي اړخه مهم بلل کېږي.
هغه د خپلو خبرو پرمهال ادعا وکړه، چې افغانستان په تېر کې په ډېرو سیاسي احزابو، قومي، سمتي او ژبنیو اجزاوو ویشل شوی و، چې په وینا یې د ملي مشترکاتو د پیاوړي کولو په برخه کې یې «لوی اکثریت» له لاسه ورکړی و.
د هغه په وینا اوس د دې ستونزې حل د خپلې ادارې د مدرسو او ښوونځیو د توحید په طرحه کې ویني او زیاتوي چې، په دې برخه کې دوی یو بنسټیز کار دا کړی چې، تر شپږم ټولګي یې د مدرسې او ښوونځي د نصاب یو کړی دی.
د ریاستالوزرا اقتصادي مرستیال پر افغانانو غږ کړی، چې د نورو له «ړانده تقلیده» لاس واخلي، د هغوی تر اغېز لاندې رانه شي او واقعیتونه «غلط تفسیر» نه کړي.