تاند ( شنبه د سلواغې ـ دلوې ۱۷مه) د طالبانو د حکومت دکور او ښار جوړولو وزارت په مشرۍ د دایمي مېشتېدنې کمېټې د تېرې اوونۍ پرمهال یو شمېر ولایتونو کې راستانه شوو کډوالو کورنیو ته ځمکې ( نمرې) وېشلې دي.
د وېش دغه بهیر د منظور شوي تفصیلي پلان له مخې ترسره شوی دی.
په دغه لړ کې، په کونړ کې ۱۵۵ راستانه شوو کډوالو کورنیو ته د ځمکو نمرې وېشل شوي، چې په دې سره په یاد ولایت کې د وېشل شویو نمرو شمېر تر ۵۰۶ کورنیو پورته شو.
دغه راز په ننګرهار کې ۵۷۰ راستانه شوو کډوالو کورنیو ته د ځمکو وېش بشپړ شو ،چې په ټوله کې تر دې دمه ۱۲۰۳ کورنیو ته د ځمکو نمرې سپارل شوې دي.
د یاد وزارت د خبرپاڼې له مخې په کندز کې ۱۰۹ راستانه شوو کورنیو ته نمرې ورکړل شوې، چې په دې سره د یاد ولایت ټولیز شمېر ۹۲۰ کورنیو ته ورسېد.
سربېره پر دې، په زابل کې هم ۶۱ راستانه شوو کډوالو کورنیو ته د ځمکو نمرې د ټاکلي پلان مطابق ووېشل شوې.
د سرچینې د مالوماتو پر اساس د همدې تېرې اوونۍ په ترڅ کې ۸۹۵ راستانه شوو کډوالو کورنیو ته د ځمکو وېش ترسره شو او په عمومي ډول تر دې مهاله په بېلابېلو ولایتونو کې ۶۴۳۷ کډوالو کورنیو ته د دایمي مېشتېدو په موخه د ځمکو نمرې سپارل شوې دي.
د یادونې وړ ده چې، تر دې وړاندې هم د هېواد یو شمېر ولایتونو کې کډوالو ته د ځمکو وېش لړۍ پيل او دایمي مېشت ځایونه ورکړل شوي دي.