په ایران کې د بندر عباس، اهواز او تهران ته نږدې سیمو کې پرلهپسې چاودنې شوې دي چې لږ تر لږه د یو کس د وژل کېدو او څو نور د ټپي کېدو تاید شوی .
د ایران د تسنیم خبري اژانس د راپور له مخې، چې له حکومت سره نږدې اړیکې لري د بندر عباس په یوه اته پوړیزه ودانۍ کې چاودنې دوه پوړونه ویجاړ کړي او شاوخوا موټرو او دوکانونو ته یې زیان اړولی دی.
بندر عباس د ایران په جنوب کې د هرمز تنګي ته څېرمه موقعیت لري او د هېواد له مهمو سمندري بندرونو څخه دی.
په اهواز ښار کې بیا د ایراني دولتي رسنیو له مخې، په یوه اپارتمان کې د ګاز چاودنه شوې چې لږ تر لږه څلور کسان پکې وژل شوي دي.
ایراني چارواکو تر اوسه د پېښو دقیق لامل نه دی څرګند کړی.
دا پېښې په داسې وخت کې رامنځته شوې چې د امریکا او ایران ترمنځ پوځي او سیاسي تاوتریخوالی زیات شوی دی. امریکا خپلې پوځي بېړۍ عربي سمندرګي ته استولي او ولسمشر ټرمپ د ایران پر ضد د احتمالي پوځي اقداماتو اشاره کړې ده.