تاند- د وینې لوړ فشار ته عموماً «غلی قاتل» وايي، ځکه چې پرته له څرګندو نښو زړه، دماغ، پښتورګي او د وینې رګونه زیانمنولی شي.
په نړۍ کې میلیونونه خلک هره ورځ د لوړ فشار لپاره درمل کاروي، خو طبي متخصصان وایي چې یوازې پر درملو تکیه کول بسنه نه کوي.
د څېړنو له مخې، منظم ورزش او د وېټامین سي استعمال کولی شي د وینې فشار په اغېزمن ډول راکم کړي. ورزش، که سپک وي او که متوسط، د وینې رګونه اراموي، د وینې جریان ښه کوي او ذهني فشار کموي. همداراز د وزن تر کنټرول لاندې ساتل هم د لوړ فشار د خطر په کمولو کې مرسته کوي.
وېټامین سي یو پیاوړی انټياکسیدان دی چې د وینې د رګونو دننه زیان کموي او د نایټرک اوکساید تولید زیاتوي، چې له امله یې رګونه پراخېږي او د وینې فشار راټیټېږي.
کارپوهان وایي چې ورزش او متوازنه غذا د ورځني ژوند برخه ګرځول د درملو ترڅنګ غوره پایلې ورکوي او د زړه او دماغ روغتیا ساتي.