تاند( دوشنبه د مرغومي ـ جدي ۲۹مه) د کابل امنیه قومندانۍ ویاند، خالد ځدراڼ وايي، نن شاوخوا درې بجې کابل ښار د شهرنو په ګل فروشۍ کوڅه کې د چينايي مسلمانانو او افغانانو ګډ رستورانټ Chinese Noodle اشپزخانې ته نږدې چاودنه شوې.
ځدران وایي، دغه رستورانت د يو چينايي مسلمان عبدالمجید او د ده د ميرمنې او يو تن افغان عبدالجبار محمود له لوري په ګډه چلول کېده.
هغه زیاتوي، عبدالمجید د چين د شينګ يانګ ايالت اوسېدونکی دی او دلته یې د چينايي مسلمانانو لپاره خواړه تيارول او پلورل.
د ځدراڼ په وینا، په نننۍ چاودنه کې د ایوب په نوم یو تن مسلمان چينايي وګړی او ۶ تنه افغانان وژل شوي او څو تنه نور ټپيان دي.
هغه وايي، د چاودنې نوعیت لا معلوم نه دی او څېړنې روانې دي.
خو بل لورته روغتیایي سرچینو بیا د ۱۳ کسانو د ټپي کېدو او د ۷ تنو د وژل کېدو ویلي دي.