تاند (سې شنبه، د مرغومي/ جدې ۳۰ مه) «رویټرز» خبري اژانس وايي چې «په سیمه کې یوه ایراني چارواکي» دې اژانس ته ویلي، د رسمي ادارو د څېړنو له مخې، د ایران په وروستیو اعتراضونو کې لږ تر لږه پنځه زره کسان وژل شوي، چې شاوخوا ۵۰۰ تنه یې د امنیتي ځواکونو غړي دي.
دغه چارواکي، چې نه یې غوښتل نوم یې څرګند شي، د یکشنبې په ورځ د مرغومي په ۲۸مه رویټرز ته ویلي چې ځینې تر ټولو سختې نښتې د ایران په شمال لوېدیځو سیمو کې شوې دي؛ هغه سیمې چې د ایراني چارواکو په وینا، هلته د حکومت مخالفې وسلهوالې ډلې فعاله دي.
ښايي د هغه اشاره کوردانو ته وي چې د ایران په شمال لوېدیځ کې اوسي.
هغه زیاته کړه چې «تمه نه کېږي» د قربانیانو شمېر به په څرګند ډول زیات شي.
دا په داسې حال کې ده چې د ایران د بشري حقونو سازمانونه بېلابېلې شمېرې وړاندې کوي او وایي چې د ملکي قربانیانو شمېر د رسمي چارواکو تر اعلان شوو شمېرو ډېر لوړ دی.
د «هرانا» په نوم د بشري حقونو سازمان د شنبې په ورځ اعلان وکړ چې تر ۲۴ زره د ډېرو کسانو نیونه هم تایید شوې ده.
هغه اعتراضونه چې د مرغومي له اوومې نېټې د ایران په ډېرو ښارونو کې پیل شول، له پراخو امنیتي غبرګونونو سره مخامخ شول. دا اعتراضونه په پیل کې د سختو اقتصادي ستونزو، د اسعارو د بیو د لوړېدو، د بازار د بېثباتۍ او د ملي پیسو د ارزښت د کمېدو پر ضد وو، خو وروسته سیاسي غوښتنې هم ورسره یوځای شوې.