د واده لپاره د مناسب عمر په اړه د سویس د زوریخ پوهنتون څېړنه څه وايي؟

تاند – که څوک وپوښتي: «د واده لپاره تر ټولو ښه عمر کوم دی؟» نو د دې پوښتنې ساده ځواب نشته.

هر انسان بېل دی او د واده لپاره یو واحد او بشپړ مناسب عمر نه شته.

خو کله چې د ذهني روغتیا خبره راځي، څېړنې ښيي چې له یوه ټاکلې عمر وروسته ناواده پاتې کېدل پر احساساتي هوساینې منفي اغېز کولی شي.

د واده په اړه د سویس د زوریخ پوهنتون په یوه څېړنه کې له ۱۷ زرو څخه د زیاتو کسانو معلومات وڅېړل شول، چې پکې څرګنده شوه چې واده نه کول پر ذهني روغتیا او له ژوند څخه پر رضایت منفي اغېز لرلی شي.

څېړنه وایي که واده و نه شي، نو له ۲۴ کلنۍ وروسته د یوازیتوب او خپګان (ډیپریشن) امکان په څرګنده توګه زیاتېږي، او تر ۲۹ کلنۍ پورې دا اغېز لا پسې شدیدېږي.

د څېړنې له مخې، د ذهني روغتیا لپاره د واده تر ټولو مناسب عمر شاوخوا ۲۶ کاله بلل شوی دی. له دې وروسته د یوازیتوب او احساساتي فشار کچه لوړېږي.

د زوریخ پوهنتون څېړونکو ویلي چې لږ تر لږه د ذهني روغتیا د ښه والي لپاره پر وخت واده کول مهم دي، که نه نو د ژوند خوښي او رضایت کېدای شي کم شي.

په دې څېړنه کې ګډونوال د پیل پر مهال ۱۶ کلن وو او د هغوی ذهني روغتیا تر نژدې ۳۰ کلنۍ پورې څارل شوې ده.

دا څېړنه د «Journal of Personality and Social Psychology» په نوم په یوه علمي ژورنال کې خپره شوې ده، چې پکې د واده، یوازیتوب او ذهني روغتیا ترمنځ اړیکې په تفصیل سره څېړل شوې دي.