تاند ( شنبه د مرغومي ـ جدي ۲۷مه) د انګلستان د کورنیو چارو وزارت وايي، د ۲۰۲۴ کال راهیسې، نږدې ۵۰ زره ناقانونه کډوال له دغه هېواده شړلي دي.
دغه وزارت وویل چې دا اقدامات د کډوالۍ قوانینو د پلي کولو او د ناقانونه پاتې کېدو باندې د کنټرول د ټینګولو د هڅو د یوې برخې په توګه اخیستل شوي دي.
د انګلستان د کورنیو چارو وزارت پرون جمعه ویلي چې، په دې خلکو کې هغه کسان شامل دي چې د پناهغوښتنې ادعاوې یې رد شوې وې یا بهرني مجرمین وو.
سرچینه زیاتوي چې،دغه راز هغه خلک چې د انګلستان د کډوالۍ قوانین یې مات کړي وو هم شړل شوي دي.
د یاد هېواد د کورنیو چارو وزارت چارواکو ټینګار وکړ چې د دې پروسې موخه یې په هېواد کې د ناقانونه پاتې کېدو او کډوالو مخنیوی دی.
انګلستان ویلي چې دا د کډوالۍ د پراخو اصلاحاتو د یوې برخې په توګه ترسره کیږي.
انګلستان داسې مهال دا راپور خپروي چې، بل لورته تېره پنجشنبه امریکا هم اعلان وکړ چې د افغانستان او پاکستان په ګډون د ۷۵ هېوادونو کډوالو د پناهغوښتنې کېسونه یې په بشپړ درولي دي.