تاند ( جمعه د مرغومي ـ جدي ۲۶مه) د درملو دجوړنې په برخه کې یو شمېر هندي پانګوال کابل ته راغلي او د افغانستان د سوداګرۍ خونې مسوولینو سره یې د درملو د تولید او پانګونې په اړه خبرې کړي.
د دې لیدنې موخه په کابل کې د درملو تولید سکټور برخه کې پانګونه بلل شوې.
وړاندې له دې افغانستان د درملو ډېره برخه له پاکستان څخه واردوله خو د دواړو هېوادونو ترمنځ د سوداګرۍ برخه کې له ستونزو ولاړېدو وروسته، افغان سوداګر اړ شول چې د هندي شرکتونو په لور مخه کړي.
د معلوماتو پر بنسټ اوس هندي پانګوال هڅه کوي په افغانستان کې پانګونه وکړي، تخنیکي ظرفیتونه لوړ کړي او د درملو د وارداتو پر ځای دغه برخه کې په افغانستان کې دننه پانګونه وکړي.
د راپورونو له مخې، د افغانستان او یو هندي درمل جوړونکی شرکت( Zydus Lifesciences ) د ۱۰۰ میلیونه ډالرو په ارزښت هوکړهلیک لاسلیک کړې ده.
د دغې هوکړې پر اساس لومړی پکې افغانستان ته د درملو واردات او وروسته د درملو فابریکې جوړول شامل دي.
هند سره د درملو برخه کې وروسته له هغې اړیکې زیاتې شوې کله چې، له پاکستان سره د طالبانو له لوري هر راز سوداګري وتړل شوه.