تاند ( پنج شنبه د مرغومي – جدي ۲۵مه) د افغانستان رسنیو ملاتړ سازمان (AMSO) په یوه خبرپاڼه کې د پاکستاني پولیسو لهخوا د افغان خبریالانو پرلهپسې نیونې غندلي او دا کړنې یې د بیان ازادۍ، د خبریالۍ د اصولو او بشري حقونو ښکاره سرغړونه بللې ده.
په خبرپاڼه کې راغلي چې، دغه سازمان ته د رارسېدلو معلوماتو لهمخې، په روانه اوونۍ کې درې افغان خبریالان د پاکستان په بېلابېلو ښارونو کې نیول شوي دي.
سرچینه زیاتوي چې، تازه پېښه د عبدالرحمن منګل اړوند ده چې نوموړی په پېښور ښار کې د پاکستاني پولیسو لهخوا نیول شوی دی.
تر دې وړاندې اسما محمدي په راولپېنډۍ او صمیم نعیمي په اسلاماباد کې نیول شوي وو.
یاد خبریالان هغه کسان دي چې د امنیتي ګواښونو له امله له افغانستانه وتلو ته اړ شوي او په پاکستان کې د سختو او نامعلومو شرایطو لاندې ژوند کوي.
خبرپانه کاږي چې، د هغوی نیول نه یوازې د انساني او حقوقي موازینو خلاف عمل دی، بلکې د خبریالانو ژوند او خوندیتوب له جدي خطر سره مخامخ کوي.
خبرپاڼه کې له ملګرو ملتونو، د خبریالانو د ملاتړکوونکو نړیوالو بنسټونو، د بشري حقونو سازمانونو او ډیپلوماتیکو استازولیو غوښتي، چې د دې موضوع جدي څارنه وکړي او د افغان خبریالانو د خوندیتوب لپاره عملي او عاجل ګامونه واخلي.