تاند ( پنج شنبه د مرغومي – جدي ۲۵مه) د طالبانو حکومت په غزني، هرات، کندز او کونړ ولایتونو کې یو شمېر نارینه او ښځینه په دورو وهلي دي او بدني سزایې ورکړې ده.
د طالبانو سترې محکمې نن پنجشنبه ویلي په کندز کې یې پر څلورو کسانو دوه کلن بند او شل، شل دورې سزا تطبیق کړې ده.
د خبرپاڼې له مخې، دغه راز څلور کسان د کونړ په غازياباد کې له یو څخه نیولې تر دوه کلونو بند او ۲۰ دورو سزا محکوم کړي دي.
محکمې دغه راز په هرات کې پرون چهارشنبه د ښځو په ګډون اووه تنه په عام محضر کې په دورو وهلې وو.
طالبان ورځ نه بلې ته د خلکو ترمخه دا ډول سزاوې زیاتوي، چې دا عمل د بشري حقونو نړیوالو سازمانونو له خوا په ځلونو غندل شوی دی.
د بشرحقونو سازمانونه له طالبانو غواړي چې دغه ډول سزاوې پای ته ورسوي او د بشري حقوقو له معیارونو سره سم چلند وکړي.
د وروستیو مالوماتو له مخې طالبانو په تېرو لسو میاشتو کې له ۸۰۰ زیات کسان صحرايي محکمه کړي او هغوی ته یې درنې سزاووې ورکړي دي.