تاند ( پنج شنبه د مرغومي – جدي ۲۵مه) د ترکمنستان چارواکو ویلي، د قزاق سمندر کې یې د ایراني بار وړونکې بېړۍ د عملې ژغورلو عملیات ترسره کړل.
د ترکمنستان بهرنیو چارو وزارت په یوه خبرپاڼه کې زیاته کړې، چې د دغه هېواد سمندري ځواک له بېړني حالت سره د مخامخ کېدو پر مهال د ژغورنې ځانګړي عملیات ترسره کړل او پکې سپاره کسان یې وژغول.
د یاد وزارت په وینا، د ترکمنستان حکومتي ادارو ټول اړین ګامونه پورته کړل، ترڅو له نړیوالو سمندري مقرراتو سره سم له بېړني حالت سره مخ کسان وژغوري.
په خبرپاڼه کې، ژغورل شوي کسان د هند او ایران اتباع ښودل شوي، خو په دې اړه نور جزیات نه دي وړاندې شوي.
د ترکمنستان بهرنیو چارو وزارت په خبرپاڼه کې زیاته کړې چې اوس مهال، اړوندې ادارې د نړیوالو اصولو پر بنسټ خپلې پروسې پر مخ وړي، ترڅو د دې ژغورنې اړوند ټول قانوني پړاوونه بشپړ شي.
قزاقستاني چارواکو دا ژغورنه د ترکمنستان د سمندري عملیاتو د پراختیا او سمندري امنیت په برخه کې د دې هېواد د عزم نښه بللې ده.